Полиция дабыл қақты: Ақмола облысында 15 бала терезеден құлап кетті

Ақмола облысының полициясы балалардың терезеден құлау деректерінің жиілегеніне байланысты дабыл қақты. Жыл басынан бері аймақта 15 бала жоғары қабаттың терезесінен құлап кеткен. Олардың арасында үш бала көз жұмды, деп хабарлайды Azattyq Rýhy.

Соңғы оқиға Аршалы ауданында болды: 5 жасар қыз бала масаға қарсы москит торына сүйеніп тұрған сәтте жерге құлап кеткен. Ол ауыр жарақат алып, Астананың орталық ауруханасына жеткізілді.

Себеп – ата-ананың қараусыз қалдыруы

Полицияның мәліметінше, мұндай қайғылы жағдайлардың басым бөлігі ата-ананың салғырттығынан болады. Үлкендер баланы аз уақытқа қараусыз қалдырып, терезені ашық немесе қорғалмаған күйде қалдырады.

Құқық қорғаушылардың ескертуі

Полиция ата-аналар мен қамқоршыларға балалардың қауіпсіздігін қамтамасыз етуді қатаң ескертуде. Әсіресе көпқабатты үйлерде тұратындар терезеге арнайы блокиратор орнатып, москиттік торға сенбеуі тиіс.

15 оқиғаның ішінде үш бала қайтыс болса, қалғандары ауыр жарақатпен аман қалған.