38 градусқа дейін ысиды: Қазақстанда алдағы бірнеше күнде ауа райы қандай болады

Атмосфералық фронтальды бөліністердің өтуіне байланысты еліміздің басым бөлігінде тұрақсыз ауа райы күтіледі, сонымен қатар найзағай ойнап, жаңбыр жауады. 4-5 қыркүйекте еліміздің батысында, 5-6 қыркүйекте солтүстік-батысында бұршақпен және екпінді желмен қатты жаңбыр жауады, деген болжам бар, деп хабарлайды Azattyq Rýhy.

Синоптиктердің болжамынша, оңтүстік, оңтүстік-шығыс, орталық аймақтарда, сондай-ақ 5-6 қыркүйекте шығыста антициклонның әсерінен жауын-шашынсыз ашық ауа райы күтіледі. Республика бойынша жел күшейеді, ал солтүстік өңірлерде түнгі және таңғы уақыттарда тұман түседі.

Шығыста, 5 қыркүйекте солтүстік-шығыста, 4-5 қыркүйекте орталықта түнгі уақытта ауа температурасы 2-10 жылы шамасында болып, топырақ бетінде 2 градусқа дейін үсік жүруі ықтимал.

Күндізгі температура:

• батыс аймақтарда 18-33 градустан 15-27 градусқа дейін төмендейді;
• солтүстік облыстарда 17-28 градустан 25-30 градусқа дейін көтеріледі;
• орталықта 20-32 градустан 25-35 градусқа дейін жылы болады;
• шығыста 12-25 градус жылы күтіледі;
• оңтүстікте 30-35 градустан 33-38 градусқа дейін ауытқиды;
• оңтүстік-шығыста 22-30 градустан 28-33 градусқа дейін жоғарылайды;
• таулы аймақтарда 12-17 градустан 18-23 градусқа дейін жылы болады.