Олардың арасында жартысынан астамы – кәмелетке толмағандар
Астанада самокат жүргізушілері тарапынан 5600-ден астам жол ережесі бұзылғаны анықталды, деп хабарлайды Azattyq Rýhy.
Қалалық Полиция департаментінің мәліметінше, 2025 жылдың басынан бері 5600-ден астам ереже бұзу фактісі анықталып, 31 жол-көлік оқиғасы тіркелді. Оның 18-і кәмелетке толмағандардың қатысуымен болған.
Жаңа оқу жылының басталуына байланысты полицейлер балалардың жолда жарақат алу қаупін болдырмауға баса мән беруде. Мектептердің маңында профилактика күшейтіліп, ата-аналарға балаларға жолда қауіпсіз жүріс-тұрыс ережелерін түсіндіру қажеттігі ескертілуде.
Рейд барысында полицейлердің өздері электросамокатпен жүріп, жол ережесін сақтау мәдениетіне жеке үлгі көрсетті. Мұндай тәсіл ережені бұзушыларды анықтап қана қоймай, қала тұрғындарының назарын қауіпсіздік мәселесіне аударуға мүмкіндік берді.
Электросамокатпен жүру кезінде жылдамдықты арттыру, жолды рұқсат етілмеген жерден кесіп өту, бағдаршам белгілерін елемеу жүргізушілерге де, жаяу жүргіншілерге де қауіп төндіреді.
Астаналық полиция қала тұрғындарын жол қозғалысы ережелерін қатаң сақтауға шақырады. Себебі жолдағы қауіпсіздік әр адамның тәртібі мен жауапкершілігіне тікелей байланысты.