Ол медициналық көмекке мұқтаж болмады
Жетісу облысында жоғалған зейнеткер табылды, деп хабарлайды Azattyq Rýhy Төтенше жағдайлар министрлігінің баспасөз қызметіне сілтеме жасап.
«Бүгін Жетісу облысы Панфилов ауданының Сарыбел ауылынан 35 км қашықтықтағы «Қылдыққарағай» аумағында 1942 жылы туған ер адамды іздеу жұмыстары басталды. Ол 28 тамыз күні үйінен шығып, қайта оралмаған», - деп хабарлады құтқарушылар.
Іздеу жұмыстарына ТЖМ күштері жұмылдырылып, дронның көмегімен аумақты шолу жүргізілді.
«ТЖД іздеу тобы Сарыбел ауылынан 15 км қашықтықтағы таулы аймақта ер адамды тапты. Ол медициналық көмекке мұқтаж болмады және үйіне жеткізілді», - деп жазылған хабарламада.
Еске сала кетейік, Төтенше жағдайлар министрлігінің қызметкерлері Алматы тауларында адасқан 4 адамды құтқарды. Құтқарушылар таулы жермен 5 км қашықтықты жүріп өтіп, теңіз деңгейінен 3 мыңнан астам метр биіктікте адасқандарды тауып, оларды таудан Шымбұлаққа дейін аман-есен түсірді.