«Астана» арнасында көптен күткен сериалдың тұсаукесері болады
«Астана» арнасы 1 қыркүйектен бастап көрермендерге әлемге әйгілі түрік телехикаясы – «Осман» туындысының алтыншы маусымын ұсынады, деп хабарлайды Azattyq Rýhy.
Бұл маусымда Осман сұлтанның мемлекет құру жолындағы күресі, ішкі-сыртқы жауларға қарсы шайқастары мен билікті нығайту жолындағы шешімдері көрініс табады. Қанды қақтығыстар, саяси интригалар мен сатқындықтар арасында Осман өзінің даналығы мен қайсарлығын көрсетіп, империяның болашағын қамтамасыз етуге тырысады.
Жаңа маусымның басты оқиғаларының бірі – Кулучахисар қамалының алынуы, сондай-ақ Османның ұлдары Орхан мен Алаэддиннің әкесінің ісін жалғастыруға дайындалуы болмақ. Қартайған Осман билікті ұрпақтарына аманаттау туралы ойға келіп, олардың болашақта талай сындардан өтуіне сенім артады.
Басты рөлді танымал актер - Бурак Озчивит сомдайды. Сонымен қатар сериалға Озге Торер (Бала), Йийит Учан (Боран Альп), Эмре Бей (Орхан Бей) сынды әртістер қатысады.