Астанада әскери салаға бөлінген 1,6 млрд теңге жымқырылғаны анықталды

Астана қаласының мамандандырылған ауданаралық қылмыстық істер жөніндегі соты мемлекеттік қорғаныс тапсырысына бөлінген қаражатты жымқыру дерегі бойынша резонанстық істі қарауды аяқтады, деп хабарлайды Azattyq Rýhy.

1,6 млрд теңгеден астам залал келтірілген

2023 жылы Қаржылық мониторинг агенттігі «Казспецэкспорт» РМК-ның лауазымды тұлғалары мен жеткізушілерді ұстаған болатын. Тергеу барысында әскери өнімдерді сатып алуға арналған бюджет қаражатының жымқырылғаны және сыбайлас жемқорлық деректері анықталды.
Мемлекетке келтірілген залалдың көлемі 1,6 млрд теңгеден асты.

Сотталғандар

Сот үкімімен:

• «Казспецэкспорт» РМК бас директоры Рамазанов А.К. – 11 жылға,
• департамент директоры Кудабаев А.Т. – 10 жылға сотталды.
• Қалған 9 айыпталушы да әртүрлі мерзімге бас бостандығынан айырылды.

Мемлекет пайдасына мүлік тәркіленді

Сот мемлекет пайдасына 1,6 млрд теңге көлеміндегі азаматтық талап-арызды қанағаттандырып, жалпы құны 607 млн теңге болатын мүлікті тәркілеу туралы шешім қабылдады.

Үкімнің мәртебесі

Сот үкімі әлі заңды күшіне енген жоқ.