Алматыда іздеуде жүрген 9 адам ұсталды

Алматы қаласында 26 тамыздан бастап «Құқықтық тәртіп» республикалық жедел-алдын алу іс-шарасы өтіп жатыр. Полицияның алғашқы күнгі жұмысы нәтижесінде бір тәулікте 24 қылмыс әшкереленді, деп хабарлайды Azattyq Rýhy.

Қылмыс пен құқық бұзушылық фактілері

Анықталған қылмыстардың ішінде мынандай істер бар:

• Ұрлық;
• алаяқтық;
• есірткі мен қаруды заңсыз сақтау;
• мас күйінде көлік жүргізу.

Сонымен қатар полиция қызметкерлері:

• бұрын жасалған 14 қылмысты ашты;
• іздеуде жүрген 9 адамды ұстады;
• «нелегал» санатында есепте тұрған 13 адамды анықтады.

1 мыңнан астам әкімшілік құқық бұзушылық тіркелді

Тәртіп сақшылары әкімшілік құқық бұзушылықтардың алдын алуға да ерекше назар аударды. Бір тәулікте 1 000-нан астам жағдай тіркелді. Көбіне бұл – қоғамдық орындарда алкоголь ішу, тыныштықты бұзу және ұсақ бұзақылықтар.

Полицияның басты мақсаты

«Профилактика жылы аясында полиция қызметкерлері президенттің «Заң және тәртіп» қағидасына сәйкес әрекет етуде. Басты мақсат – құқық бұзушылықтарды анықтап қана қоймай, олардың алдын алу. Азаматтардың өздерін қауіпсіз сезінуі және қалада құқықтық тәртіптің сақталуы маңызды», – деді Алматы қаласы ПД Жергілікті полиция қызметі басқармасы бастығының орынбасары Тимур Ноғайбаев.

Іс-шара 28 тамызға дейін жалғасады.