Астанада екі алаяқ 150 адамды алдап, 1 млрд теңгесін қағып алған

Астанада бірнеше жыл бойы мемлекеттік бағдарлама атын жамылып, азаматтарды алдаған екі алаяққа қатысты сот үкімі шықты, деп хабарлайды Azattyq Rýhy.

Прокуратураның мәліметінше, олар жалға алынған кеңседе жұмыс істеп тұрған ЖШС деректемелерін пайдаланып, тұрғындарға Астана мен Алматыда жоғары санатты пәтер береміз, сондай-ақ мемлекеттік бағдарлама арқылы жеңілдетілген несие рәсімдейміз деп уәде еткен. Жалған келісімшарттар арқылы 150 адамға 1 млрд теңгеден астам шығын келтірілді.

Сот үкімімен:

• әрқайсысы 6 жыл 8 айға бас бостандығынан айырылды;
• 5 жылға материалдық жауапты және басшылық қызмет атқару құқығынан айырылды;
• жәбірленушілерге келтірілген залалды өтеу міндеттелді.

Жеңілдететін мән-жай ретінде сотталушылардың кәмелет жасқа толмаған балаларының болуы және шығынды жартылай өтеуі ескерілді.

Прокуратура азаматтарға ескерту жасады: құқықты растайтын ресми құжаты жоқ адамдарға сенбеу, несие немесе тұрғын үй рәсімдеуде тек заңды мекемелермен келісім жасау қажет.