Астанада екі ай ішінде 300 келіден астам есірткі тәркіленді

Астана қаласы Полиция департаментінде департамент бастығының міндетін атқарушы Қуаныш Орынбетовтың төрағалығымен «Қарасора-2025» жедел-профилактикалық іс-шарасы ның өту барысына арналған жедел кеңес өтті. Жиында соңғы екі ай ішінде 300 келіден астам есірткі тәркіленгені айтылды, деп хабарлайды Azattyq Rýhy.

Іс-шараның негізгі міндеттері

1 маусым мен 31 қазан аралығында елордада өтетін ауқымды науқанның басты мақсаты:

• жабайы және қолдан өсірілген сораны анықтап, жою;
• есірткі заттарының заңсыз айналымына тосқауыл қою;
• кінәлілерді жауапкершілікке тарту;
• ведомствоаралық өзара іс-қимылды күшейту.

Нәтижелер

Іс-шара басталғалы екі ай ішінде:

• 201 есірткіге қатысты құқық бұзушылық тіркелді;
• заңсыз айналымнан 300 келіден астам есірткі заты тәркіленді;
• есірткі сату жөнінде ақпарат жариялаған 302 интернет-ресурс бұғаттауға жолданды.

Профилактика және жастармен жұмыс

Жазғы демалыс кезеңінде профилактикалық шаралар балалар мен жасөспірімдерге ерекше назар аударумен жүргізілуде. Мектеп жанындағы лагерьлерде дәрістер оқылып, нарко-граффити бояу акциялары мен есірткіге қарсы флешмобтар ұйымдастырылды.

Әкімшілік, мүдделі органдар және ҮЕҰ-мен бірлесіп, барлығы 128 профилактикалық іс-шара өткізілді.

Полицияның үндеуі

Астана қаласы Полиция департаменті азаматтарды белсенді азаматтық ұстаным танытуға шақырып, есірткі қатеріне қарсы күрес – бүкіл қоғамның ортақ ісі екенін еске салды.