Алаяқтар ер адамға ешкімді тыңдамауға кеңес берген
Оралда полицейлер алаяқтардың арбауына түскен тұрғынның 1,3 млн теңгесін сақтап қалды, деп хабарлайды Azattyq Rýhy Polisia.kz-ке сілтеме жасап.
Полиция қызметкерлері қаладағы сауда және ойын-сауық орталықтарының бірінде терминал жанында телефонмен сөйлесіп тұрған ер адамды байқайды.
«Ер адамның деректерді енгізу кезінде уайымдап, асығыс әрекет етуі күмән тудырған. Полицейлер араласып, телефонның ар жағында алаяқтар болуы мүмкін екенін түсіндіруге тырысқан. Алайда ер адам ақшаны аударуға табандап тұрып алған. Телефон тұтқасындағы өзін «Тамара» деп таныстырған әйел оған ешкімді тыңдамауға кеңес беріп, бірнеше минуттан кейін «қызы» мен «ұлы» да әңгімеге қосылған», - деп жазылған хабарламада.
Кейін белгілі болғандай, бірнеше күн бойы алаяқтар ер адамға телефон шалып, өздерін полиция қызметкерлері ретінде таныстырып, оның жинағына қауіп төнгенін айтып сендірген. Ақшаны «құтқару» үшін оған депозиттен қаражатты шешіп, «қауіпсіз» есепшотқа аудару керек болған.
Полиция қызметкерлерінің дер кезінде әрекет етуінің арқасында 1,3 миллион теңгенің аударылуына жол берілмеді.
«Телефон және интернет арқылы жасалатын алаяқтықтың, әсіресе зейнеткерлерге бағытталған қылмыстардың көбеюіне байланысты Батыс Қазақстан облысында полиция және жеке күзет қызметкерлері банкоматтар маңында және халық көп жиналатын орындарда — ең алдымен сауда ойын-сауық орталықтарында алдын алу шараларын жүргізіп жатыр», - дейді полиция.
Мақсат – «тәуекел аймағында» жедел әрекет ету, алаяқтарға ақша аударудың алдын алу және халықтың хабардарлығын арттыру.
Полиция құқық қорғау органдарының қызметкерлері ешқашан ақша аударуды талап етпейтінін ескертті. Күмән тудыратын кез келген қоңырау кезінде бірден «102» нөміріне хабарласу керек.