Руслан Берденов сот отырысына онлайн қатысты
Шымкент қаласы әкімінің орынбасары Руслан Берденов өзіне жасалған шабуыл бойынша сот процесінде куәлік берді. Келесі операция басталғанға дейін зардап шегуші онлайн түрде сот залына қосылып, прокурорлар, адвокаттар мен судьяның сұрақтарына жауап берді, деп хабарлайды Azattyq Rýhy.
Руслан Берденовке оқ атқан Ернар Жиембай бұл мүмкіндікті пайдаланып, Берденовтен бірнеше рет кешірім сұрады. 21 сәуір күні кешке ол аңшылық мылтықтан бес рет оқ атқан болатын. Шабуыл оқиғасы қала әкімдігі ғимаратына орнатылған сыртқы бақылау камераларына түсіп қалды.
Руслан Берденов Ернар Жиембаймен өмірде небәрі екі-ақ рет кездескенін айтты. Біріншісі – әкімдікте өткен жиында, онда Жиембай өз атқарған жұмысын дұрыс баяндамаған. Екіншісі – Берденовтің жұмыс кабинетінде өткен кездесу.
«Ол жасалған жұмыстар туралы ешқандай ақпарат бере алған жоқ. Үйлерді жаңғырту, мердігерлер жөнінде нақты есеп жоқ еді», – деп түсіндірді Берденов Жиембайдың сол кезде «Тұрғын үй Шымкент» ЖШС-ін басқарып тұрған кездегі жұмысына наразылық себептерін.
Берденовтің айтуынша, Жиембай жұмысына жауапты болмаған, «қажет болса кетемін» деп айтқан, бірақ өз еркімен жұмыстан шығу туралы өтініш жазуға асықпаған. Оған бірнеше рет ескерту жасалған, оның ішінде 21 сәуірде де, дәл сол күні атыс болған.
Ал Жиембайдың жары Луиза Алданова туралы қала әкімінің орынбасары мүлде білмейтінін айтты:
«Ешқандай лайк, пікір болған жоқ, мен оны мүлде танымаймын. Оны полиграф арқылы растай аламын», – деді Берденов.
Жиембай бұл сөздерді жоққа шығарған жоқ және зардап шегушіге видеобайланыс арқылы жеке жолы болған кезде кешірім сұрап, тезірек сауығып кетуін тіледі.
«Түрмеден шыққан соң еркекше келіп, кешірім сұраймын», – деді Ернар Жиембай.
Руслан Берденов Ернар Жиембайдың әйеліне қатысты айтқан айыптауларын қатаң сынға алып өтті.
«Өз әйеліңді, балаларыңның анасын бұл іске тарту – дұрыс емес. Егер еркек болсаң, әйеліңді бұл лас әңгімелерге араластырмас едің. Өз қолыңмен істеген ісің үшін өз басыңмен жауап беру қажет. Мен сіздің мақсатыңызды білемін. Әкең менің адвокатыма хабарласып, карьерама нүкте қоятынын айтып қорқытқан», – деді Берденов.
Оның пікірінше, шабуыл жасаудың себебі – қызғаныштан адамның өміріне қауіп төндіру ісі аса ірі көлемде ұрлық жасауға қарағанда жеңіл жазаланады. Берденов нақты қандай ұрлық туралы екенін айтпады.
Берденовтің пікірін тыңдағаннан кейін сот тараптардың пікірталасына көшуді жоспарлап отыр.
Қала әкімі орынбасары сөз арасында денесінде әлі де 61 бытыра қалып қойғанын, оның бірі жүректен 13 см, екіншісі бүйректен небәрі 0,3 см, ал тағы бірі мойындағы басты артериядан 0,2 см жерде тұрғанын қозғап өтті. Дәрігерлерге ота кезінде бауырды қайта «құрастыруға» және өкпенің 20%-ын алып тастауға тура келген, дейді ол.
Айта кетейік, осыған дейін Берденовтің сотында күдікті өткір мәлімдеме жасап, әйелімнің суретіне лайк басып, «әдемісің» деп айтқаны хабарланған.