Астық жинау науқаны: Қазақстанда алғашқы 10 күнде 1,6 млн тонна астық жиналды

Қазақстанның 12 өңірінде егін жинау науқаны қызу жүріп жатыр, алғашқы 10 күнде 1,6 млн тонна астық жиналды, деп хабарлайды Azattyq Rýhy.

Үкіметтің баспасөз қызметі таратқан мәліметке сәйкес, президент Қасым-Жомарт Тоқаевтың тапсырмасымен ауыл шаруашылығы тауарын өндірушілерді қолдау, тәуекелдерді азайту және елдің азық-түлік қауіпсіздігін күшейту басты назарда.

1,1 млн гектар алқап орылды

Соңғы деректер бойынша:

• 1,1 млн гектар (дәнді дақылдардың 6,6%-ы) орылды;
• 1,6 млн тонна астық бастырылды;
• 17,4 мың тонна майлы дақыл,
• 363,5 мың тонна картоп,
• 1,3 млн тонна көкөніс,
• 1,6 млн тонна бақша өнімі жиналды.

Жаппай егін жинау тамыздың үшінші онкүндігінде басталады

Ел бойынша егін жинау жұмысына:

• 139 мың трактор,
• 31 мың астық жинайтын комбайн,
• 17 мың орақ,
• 130 мың басқа да техника жұмылдырылмақ.

Қазіргі уақытта техниканың дайындық деңгейі 93%.

Шаруаларға арзандатылған дизель отыны бөлінді

Өңірлерге егін жинауға 402 мың тонна дизель отыны бөлінді. Бағасы – 254 теңге/литр, бұл нарықтық бағадан 18–20%-ға арзан.