Заңсыз сатылған электр энергиясының жалпы көлемі 50 мегаватт-сағаттан асты
Шығыс Қазақстан облысында құны 9 млрд теңгеден асатын заңсыз электр энергиясын сату дерегі анықталды, деп хабарлайды Azattyq Rýhy.
Қолданыстағы заңнама бойынша, майнинг кәсіпорындарына электр энергиясы тек бірыңғай мемлекеттік сатып алушы арқылы және 1 мегаватт-сағаттан аспайтын көлемде сатылуы тиіс.
Алайда бірқатар энергиямен жабдықтаушы компания бұл талапты елемей, екі жыл бойы халыққа, әлеуметтік нысандарға және стратегиялық кәсіпорындарға арналған электр энергиясын майнингке бағыттаған.
Заңсыз сатылған электр энергиясының жалпы көлемі 50 мегаватт-сағаттан асты. Бұл 50–70 мың тұрғыны бар қаланың бір күндік энергия тұтынуымен шамалас.
Тергеу мәліметінше, қылмыстық жолмен табылған қаражатқа ұйымдастырушы елордадан 2 пәтер және 4 автокөлік сатып алған. Бұл мүліктер сот санкциясымен бұғатталды.
Іс бойынша тергеп-тексеру жұмыстары жалғасып жатыр. ҚР ҚПК-нің 201-бабына сәйкес, өзге мәліметтер жария етілмейді.