Алматыда бойжеткенмен онлайн танысып, үйіне барған жігітті «екі ағасы» тонап кетті

Алматыда бойжеткен қыз баламен онлайн танысып, үйіне барған жігітті «екі ағасы» тонап кетті, деп хабарлайды Azattyq Rýhy.

Қалалық полиция деректеріне сүйенсек, қылмыс Алмалы ауданында болған.

Қызбен кездесуге барамын деп заттарынан айырылды

Жәбірленуші ер азамат танысу сайты арқылы бір қызбен танысып, оның үйіне барған. Алайда кездесудің ортасында қыздың екі танысы келіп, жәбірленушіні қорқытып, жеке заттарын тартып алып, оқиға орнынан ізін жасырған.

Қылмыстық топ ізін суытпай ұсталды

Оқиға бойынша:

• Екі ер адам мен бір қыздан тұратын үш күдікті ұсталды;
• Олар уақытша ұстау изоляторына қамалды;
• Қылмыстық іс тонау дерегі бойынша тергелуде.

Алмалы аудандық полиция басқармасының бастығы Мақсат Пшан бұл жағдайдың қаланың басқа аудандарында да тіркелгеніне назар аудартып, азаматтарды абай болуға шақырды.

Полиция тұрғындарға үндеу жолдады

Алматы қалалық полиция департаменті тұрғындарға мынандай кеңес айтты:

• Бейтаныс адамдарға сенбеу;
• Күмәнді мекенжайларға бармау;
• Жаңа таныстармен кездесер алдында жақындарына міндетті түрде хабар беру.