Жетісу облысында марихуана таратқан фитозертхана анықталды

Жетісу облысының полиция қызметкерлері марихуана таратқан фитозертхананы анықтады, деп хабарлайды Azattyq Rýhy.

Жедел бақылау нәтижесінде ерекше иісі бар, жасыл түсті өсімдік тектес заты салынған зип-пакеттер табылған екі қаптама снек сатып алынған. Сот сараптамасы бұл заттың марихуана екенін растады – салмағы 2,5 грамм.

Күдікті – 36 жастағы Талдықорған қаласының тұрғыны. Оның үйін тінту барысында мынадай заттар тәркіленді:

• шығу тегі белгісіз тұқымдар салынған 7 қаптама;
• қолдан жасалған шылым шегуге арналған құрылғы;
• қоңыр түсті ұнтақ салынған зип-пакет;
• тыңайтқыш құйылған 7 бөтелке;
• қарасораға ұқсас өсімдігі бар 2 гүлсауыт.

Сараптама нәтижесінде алынған заттың 18 грамы – кептірілмеген қарасора, 34 грамы – кептірілген марихуана. Сондай-ақ, каннабис тектес өзге де заттар тіркелген.

Тергеу барысында күдіктінің үйінде арнайы жарықтандыру құралдарымен жабдықталған, тыңайтқыштар пайдаланылған фитозертхана ұйымдастырғаны белгілі болды. Онда өсірілген өнім азық-түлік өнімдерінің арасына жасырып, тұтынушыларға өткізілген.

Аталған факт бойынша сотқа дейінгі тергеу амалдары жүргізілуде. Күдікті қамауға алынды.

Ескерту:

Есірткі құралдарын заңсыз сатып алу, сақтау, тасымалдау, өткізу немесе жөнелту ҚР Қылмыстық кодексіне сәйкес, 5 жылдан 8 жылға дейін бас бостандығынан айыру жазасына әкеп соғады. Мүлкі тәркіленуі мүмкін.