Қақтығыс кезіндегі шектеулер алынды
Иран билігі Израильмен арадағы 12 күндік қақтығыс кезінде енгізілген әуе шектеулерін ресми алып тастағанын хабарлады. Бұл туралы Azattyq Rýhy Иранның Азаматтық авиация ұйымының мәлімдемесіне сілтеме жасап хабарлайды.
Мәлімдемеде көрсетілгендей, ел ішіндегі және халықаралық бағыттардағы ұшулар соғысқа дейінгі қалыпты деңгейге оралды.
Сонымен қатар, Иран астанасы Тегеранда орналасқан «Мехрабад» халықаралық әуежайы тәулік бойғы жұмыс режиміне қайта көшті.
«Осы сәттен бастап әуе компаниялары мен туристік агенттіктер әуе билеттерін сату және рейстерді брондау қызметін тәулік бойы ұсынуға құқылы», — делінген Азаматтық авиация ұйымының хабарламасында.
Иран 2025 жылдың 13 маусымында Израильдің Тегеран мен басқа да аймақтарға жасаған әуе шабуылдарынан кейін әуе кеңістігін жауып тастаған болатын.
Қақтығыс 12 күнге созылып, 24 маусымда атысты тоқтату туралы келісіммен аяқталды.