Оны іздеу жұмысы екі тәулікке жуық уақытқа созылды
Алматы тауларында өткен жексенбі күні жоғалып кеткен 20 жастағы Алан есімді жігіттің денесі табылды, деп хабарлайды Azattyq Rýhy.
Алматы қалалық Төтенше жағдайлар департаментінің мәліметінше, 29 шілдеде «Жастар» шыңында жексенбі күні жоғалған 20 жастағы Аланның денесі табылды.
Аталған маршрут күрделі және мұздықтар бар. Сондықтан құтқарушылардың жоғары көтерілуі мен денені түсіруі шамамен 5 сағатқа созылған.
Қазіргі уақытта тау бөктерінде полиция қызметкерлері мен психолог мамандар жұмыс жүргізіп жатыр.
Аланды іздеу жұмысы екі күнге жуық жалғасқан. Бұл іске ТЖМ-нің тікұшағы, 50-ден астам құтқарушы мен ерікті, арнайы техника, дрондар және кинологтар жұмылдырылған.
Еске салайық, Алан 27 шілде күні Медеу жақтан «Жастар» шыңына аттанған. Ол соңғы рет сол күннің таңертеңінде байланысқа шыққан болатын.