«Теңізшевройл» компаниясына 639,6 млн теңге айыппұл салынды

Атырау облысында атмосфералық ауаны ластау деректері бойынша «ТШО» ЖШС-ға қомақты айыппұл салынды, деп хабарлайды Azattyq Rýhy.

Прокуратура ірі заңбұзушылықтарды анықтады

Табиғат қорғау прокурорлары экологиялық қауіпсіздікке қатысты жоспардан тыс тексеру жүргізіп, атмосфералық ауаның ластануына байланысты бірқатар өрескел заң бұзушылықты анықтады.

Талдау қорытындысы бойынша, «Теңізшевройл» ЖШС 2023 жылдың 3 және 4 тоқсандарында, сондай-ақ 2024 жылдың алғашқы жартысында экологиялық нормативтерден тыс 49,3 тонна зиянды затты ауаға шығарған.

Экологиялық рұқсатсыз – 4,9 тонна шығарынды

Соның ішінде 4,9 тонна ластаушы зат қоршаған ортаға ешқандай экологиялық рұқсатсыз тасталған.

Бұл заңбұзушылықтар Қазақстан Республикасының экологиялық заңнамасына қайшы келеді.

639,6 млн теңге айыппұл салынды

Анықталған құқықбұзушылықтарға байланысты, прокурордың қаулысы негізінде «ТШО» ЖШС-ға әкімшілік іс қозғалды.

Сот шешімімен компанияға 639,6 миллион теңге көлемінде айыппұл салынды. Бұл шешім заңды күшіне енді.

Ауаның ластануы – өңірдің басты экологиялық проблемасы

Прокуратура өкілдерінің айтуынша, атмосфералық ауаның ластануы Атырау облысындағы аса өзекті экологиялық мәселелердің бірі. Осыған байланысты қадағалау жұмысы ұдайы және жүйелі түрде жүргізіліп отырады.