«Апатты жағдайда»: Бас көлік прокуратурасы ҚТЖ-ның былықтарын тізбектеп шықты

Бас көлік прокуратурасында теміржол саласындағы заңдылық пен қауіпсіздікті қамтамасыз ету мәселелері бойынша кеңейтілген алқа отырысы өтті. Басқосуда уәкілетті органдар мен «Қазақстан Темір Жолы» ҰК» АҚ, әсіресе Магистральдық желі дирекциясының қызметі жан-жақты талқыланды, деп хабарлайды Azattyq Rýhy.

Жүйелі проблемалар анықталды

Прокурорлық тексерулер нәтижесінде теміржол инфрақұрылымын басқару мен пайдалану барысында елеулі жүйелі кемшіліктер бары белгілі болды. Атап айтқанда:

• Магистральдық жолдардың кейбір учаскелері қатты тозған;
• Электр беру желілері мен сигнал беру жүйелері жөндеуді қажет етеді;
• Теміржол көпірлері апаттық жағдайда тұр.

Аталған проблемаларға уақытылы шара қолданылмауы олардың ушығуына алып келген.

274 шақырым жол уақытша жабылды

Прокуратура бастамасымен жалпы ұзындығы 274 шақырым болатын 29 теміржол учаскесі анықталған бұзушылықтар жойылғанға дейін уақытша жабылды. Қабылданған шаралардың арқасында бұл учаскелердегі ақаулар толықтай жойылып, қазіргі таңда жолдар қауіпсіз режимде жұмыс істеуде.

Еңбек құқықтарының бұзылуы тіркелді

Теміржол саласы қызметкерлерінің еңбек құқықтарын бұзу деректері де анықталды. Атап айтқанда:

• Сыйақы уақытылы және әділ төленбеген;
• Сапасыз арнайы киім мен құралдар сатып алынған;
• Жұмысқа қажет жабдықтар уақтылы берілмеген.

Бұл жайттар да прокурорлық шаралар арқылы назарға алынды.

Бес теміржол желісі мемлекет меншігіне қайтарылды

Прокурорлық қадағалау актісінің нәтижесінде Ақтау теңіз порттарымен теміржолды байланыстыратын бес магистральдық жол мемлекет меншігіне қайтарылды.

Қатаң бақылау жалғасуда

Алқа отырысының қорытындысы бойынша көлік прокуратурасы уәкілетті мекемелерден барлық анықталған кемшіліктерді жоюды және олардың болашақта қайталанбауын қамтамасыз етуді талап етті.

Бас көлік прокуратурасы теміржолдағы қауіпсіздік мәселелерін қатаң бақылауда ұстап отыр. Бұл бағыттағы жұмыс жүйелі түрде жалғасатын болады.