Хайуанаттар бағының басшылығы келушілерге үндеу жасады
Алматы қаласының хайуанаттар бағы келушілерге жануарларды өз бетінше тамақтандырудың зиян екенін түсіндірді. Себебі кейбір азықтар жануарлардың денсаулығына айтарлықтай қауіп төндіруі мүмкін, деп хабарлайды Azattyq Rýhy.
Хайуанаттар бағының Instagram парақшасында жарияланған мәліметке сәйкес, жануарлар арнайы құрамы есептелген диета бойынша тамақтанады. Алайда, келушілер ескерту тақтайшаларына қарамастан, жануарларды өздерімен ала келген азықпен тамақтандыруын жалғастырып келеді.
«Мысалы, кәдімгі капуста құрамында күкірт мөлшері көп. Ол жануарлардың ішінің кебуіне әкелуі мүмкін», – дейді мамандар.
Зообақ қызметкерлерінің айтуынша, бұлан, бұғы секілді жануарлардың төлдері негізінен анасының сүтімен қоректенеді, бірақ ересектерге еліктеп басқа азықтарды да жей бастайды. Мұндай сәтте оларды дұрыс емес тағаммен тамақтандыру – өлімге әкелетін асқазан-ішек ауруларына соқтыруы мүмкін.
Кейбір келушілер жануарларға чипсы, жүгері таяқшалары секілді тағамдарды ұсынуға тырысады. Бұл өнімдер қатаң тыйым салынған, себебі жануарлардың ағзасына ауыр зиян келтіруі мүмкін.
Хайуанаттар бағында кейбір жануарларды арнайы белгіленген уақытта, зоотехниктердің бақылауымен ғана тамақтандыруға рұқсат етіледі. Өз бетімен әкелінген тағамды беру – жануарларға күтпеген қауіп төндіреді.
«Көпшілік бұл әрекетті мейірімділік деп ойлайды. Алайда бұл – жануарларға зиян келтіру», – делінген зообақ хабарламасында.
Алматы хайуанаттар бағы келушілерді жануарлардың денсаулығы мен қауіпсіздігіне бей-жай қарамауға шақырады. Егер жануарларды жақсы көрсеңіз – оларға күтім мен қауіпсіздік ережелерін сақтау арқылы көмектесіңіз.