Үлкен Алматы көліне серуендеп шыққан қытайлық турист жарақат алып қалды
Оның иығы зақымданып, жүре алмай қалған
Алматының Бостандық ауданы аумағындағы Үлкен Алматы көлі маңында жүргізілген рейд барысында құтқарушылар жарақат алған Қытай азаматын анықтап, дер кезінде көмек көрсетті. Бұл туралы ҚР Төтенше жағдайлар министрлігі хабарлады, деп жазады Azattyq Rýhy.
Қиын жер бедерінде жарақат алған турист табылды
2007 жылы туған шетелдік қыз тауда жүрген кезінде құлап, жарақат алған. Алдын ала мәлімет бойынша, оның иығы зақымданып, қозғалыс шектелген. Оқиға күрделі жер бедері мен шектеулі көріну жағдайында болған.
Құтқарушылар жедел әрекет етті
Республикалық жедел-құтқару жасағы (РЖҚЖ) мамандары жедел түрде алғашқы медициналық көмек көрсетіп, жарақаттанған иығына бекіткіш шина салды. Кейін зардап шеккен азамат қауіпсіз жерге жеткізіліп, жедел жәрдем қызметіне тапсырылды.
Құтқарушылардың кәсібилігі өмірді аман сақтап қалды
ТЖМ құтқарушыларының кәсіби әрі шұғыл әрекетінің арқасында турист дер кезінде қажетті медициналық көмек алды.
