Әуе көлігі адамдарға жақын ұшып, ағаштарды жанап өтті
Әлеуметтік желіде Алматы тауларында түсірілген тікұшақтың қауіпті ұшуы бейнеленген видео тарады. Кадрларда әуеге көтерілген тікұшақтың адамдар тобына өте жақын ұшып өткені және ағаш бұтақтарын соққан сәті анық көрінеді, деп хабарлайды Azattyq Rýhy.
Видеоға қатысты «Қазавиаспас» акционерлік қоғамының баспасөз қызметі ресми түсініктеме берді. Видеодағы тікұшақ – осы мекемеге тиесілі әуе көлігі екені расталды.
«Тікұшақ «Медеу» спорт кешені маңындағы ресми алаңнан жоспарлы түрде көтерілген. Ұшуға алдын ала өтінім берілген. Әуе кемесін ұшу тәжірибесі мен расталған біліктілігі бар тәжірибелі ұшқыш басқарды», – деп хабарлады «Қазавиаспас».
Ұшудан бұрын бортмеханик азаматтарды қауіпсіз қашықтықты сақтауға шақырған. Алайда алдын ала болжанбаған күшті жел мен оның бағытының күрт өзгеруі тікұшақтың тұрақтылығына әсер етуі мүмкін екені айтылды.
Оқиғаның нақты себептері ішкі қызметтік тексеру аясында анықталуда. Қауіпсіздік ережелерінің сақталуы мен ұшу кезінде болған барлық жағдайлар жіті зерттелетін болады.