Прокуратура пайдаланылмай жатқан жерлерді анықтауда жүйелі жұмыс жүргізуде
Солтүстік Қазақстан облысында прокуратура органдары мақсатты пайдаланылмай жатқан жер телімдерін анықтап, оларды мемлекет меншігіне қайтару бағытында кешенді жұмыстар атқаруда. 2025 жылдың басынан бері жалпы ауданы 146 мың гектардан асатын 75 жер учаскесі тексеріліп, олардың ауыл шаруашылығы және коммерциялық мақсаттарға сай қолданылмағаны анықталды, деп хабарлайды Azattyq Rýhy.
Ақжар, Есіл, Ғабит Мүсірепов, Тимирязев және Уәлиханов аудандарында жер пайдаланушылар ұзақ уақыт бойы ауыл шаруашылығы мақсатындағы 45 жер телімін иесіз қалдырған. Бұл – Жер кодексінің талаптарын бұзу болып есептеледі.
Петропавл қаласында кәсіпкерлік мақсатта бөлінген 123 гектар жер үш жыл бойы пайдаланылмай келген. Жер кодексіне сәйкес, бұл жағдай да заң бұзушылық ретінде қарастырылған.
Қадағалау актілері негізінде жалпы ауданы 33,2 мың гектарды құрайтын, кадастрлық құны 29,8 млрд теңге болатын 36 жер учаскесі мемлекет меншігіне қайтарылды.
Мемлекет басшысының 2024 жылғы 2 қыркүйектегі жолдауында жүктелген тапсырмаға сай, жергілікті атқарушы органдар қайтарылған жерлерді адал ниетті, тиімді жұмыс істейтін жер пайдаланушыларға беру бойынша нақты шаралар қабылдауда.
Пайдаланылмай жатқан жерлерді анықтау және оларды мемлекет меншігіне қайтару жұмыстары алдағы уақытта да жалғасын табады. Бұл – жер ресурстарын тиімді басқаруға және ауыл шаруашылығын дамытуға бағытталған маңызды қадам.