«Үйде отырыңыз деп қалдырып кетті»: «Славян базары» жеңімпазының анасы қатты толқығанын айтты

«Славян базары» халықаралық өнер фестивалің биылғы гран-при иегері Алмагүл Батталиева мен балалар арасында 1-орынды қанжығалаған Мирас Нағашыбай Беларусьтің Витебск қаласынан елге оралды, деп хабарлайды Azattyq Rýhy 24.kz-ке сілтеме жасап.

Әннен шашу шашылды

Жас таланттарды Алматы әуежайында туған-туыстары, дос-жарандары мен әріптестері қарсы алды. «Славян базары» байқауының бас жүлдегері Алмагүл Батталиеваны әуежайда әріптестері әннен шашу шашып қарсы алды. 

Алмагүлдің өзі Алматыда туып өскен. Осындағы Темірбек Жүргенов атындағы Өнер академисының түлегі. Соңғы екі жылдан бері  Жетісу облыстық Дәнеш Рақышев атындағы филармониясында жұмыс істейді. Бұған дейін «Славян базары» байқауына қатысуға бірнеше рет талаптанып көрген. Бірақ іріктеу кезеңінен өте алмапты.

«Сенімдеріңізді ақтадым деген үміттемін. Қазақ халқы деген талантты халық қой. Бізде талантты әншілер өте көп. Іріктеуден өту екінің бірінің қолынан келе бермейді. Мен 8 жыл бойы ұлттық іріктеуге қатысып, 8-рет дегенде өтіп халқымның елімнің намысын қорғаудың сәті түсті», - дейді Алмагүл Батталиева.

Бірнеше байқауға қатысқан

Алмагүл ақтық кезеңде «Вечность» әнін орындап,  талғампаз тыңдарманның да, қазылар алқасының да ыстық ықыласына бөленді. Екі күндік байқау нәтижесінде 137 ұпай жинап, үздік атанды.

Анасының айтуынша, ол бала кезден әнге құштар болып өскен. Көптеген аспапты жетік меңгерген.  Талантты әнші бұған дейін де бірнеше халықаралық байқауда бақ сынап, кәсіби шеберлігін шыңдады. 

«Бүгін шексіз бақыттымын. Екі ай бұрын турды ұтып алғанын естідім. Мен сенімен бірге барайыншы десем, үйде отырыңыз деп қалдырып кетеді. Жарыстарды ұтып келеді. Осы жолы қатты толқыдым», - дейді Алмагүл Батталиеваның анасы Гүлнәр Батталиева.

Беларусь өкілімен тең ұпай жинаған

Ән додасында топ жарған тағы бір жерлесіміз – 13 жасар Мирас Нағашыбай. Алматы облысы Жамбыл ауданының Қайназар ауылынан. Кішкентайынан ән айтады. Қазір музыкалық мектепте оқиды. Ол 14 мемлекеттен келген балалардың ішінен бірінші орын иеленді. 

 «Екі ән орындадым. Бірі – Қошқар мен Теке мультфильміндегі Ақтамберді жыры. Екінші күні оркестрмен Олег Газмановтың «Есаул» әнін орындадым. Екеуінде жақсы балл алып, 136 балл жинадым. Сосын өкінішке қарай, Беларусь өкілімен теңесіп қалып, оларға гран-приді беріп, бірінші орын алдым», - дейді «Славян базары» балалар байқауының 1-орын иегері Мирас Нағашыбай.

Бұл жетістік жас әншілер үшін үлкен белес. Ел үшін  мақтаныш. Сонымен қатар Қазақстан мәдениетінің, өнерінің  халықаралық деңгейде танылып, жаңа биіктерге көтерілуінің дәлелі.