Өскеменде жоғалған зейнеткер шөптің арасынан табылды (ВИДЕО)

Автор: Алмас Ерсін

Іздеуге полиция қызметкерлерімен қатар, дрон пайдаланылды

Фото: freepik.com

Өскеменде жоғалған зейнеткер дронның көмегімен табылды, деп хабарлайды Azattyq Rýhy Polisia.kz-ке сілтеме жасап.

Үйге қайта оралмаған

12 шілдеде Өскемен қаласында 71 жастағы жергілікті тұрғын үйінен шығып кетіп, қайта оралмаған.

«Бірнеше сағат өткен соң, оның немересі полицияға жүгініп, әжесінің жоғалғаны туралы хабарлаған. Бұған дейін туыстары әйелді өз бетінше іздеп көрген, алайда нәтиже болмаған», - дейді полицейлер.

Хабарлама келіп түскен бойда полицейлер жедел-іздестіру шараларына кіріскен. Іздеуге полиция қызметкерлерімен қатар, дрон пайдаланылды.

«Дрон операторы жерді әуеден шолып, патрульдік топтарға нақты координаттарды жеткізіп отырды», - деп жазылған хабарламада.

Ұзақ уақыт адасып жүрген

13 шілде күні түнгі сағат бір кезінде зейнеткер қалың шөп арасына кіріп кеткен жерінен табылды — ол ұзақ уақыт бойы адасып жүріп, үйге қайтар жолды таба алмағанын айтқан.

Қазіргі уақытта оның өмірі мен денсаулығына ешқандай қауіп төніп тұрған жоқ.