Ол ата-анасы тірі адамдарға оларды бір жерде отырғызбауға, әрі-бері жүргізуге кеңес берді
Әнші Сәкен Майғазиев ұлының тойына жарының орнына анасын ертіп барған Бүркітке (шын аты – Айбек Жансейітов) риза болғанын, алайда әріптесінің анасын арнайы шақырмағанына қатты ыңғайсызданып қалғанын айтты, деп хабарлайды Azattyq Rýhy.
«Менің анам 88-ге келді ғой. Бірақ өзі 94-мін деп айта береді. Сосын бір нәрсені 5 рет қайталайды. Ұмытып қалады. Есте сақтау қабілеті нашаралап жатыр. Бір үйден кейін тұратын үлкен әпкем анама күніне 2 рет келетін. Бір дәмді тамақ істесе де ала келетін. Бала-шағасымен келіп араласатын. Әпкемізді жанымдағы жарығым деп отыратын. Соған әбден арқа сүйеп қалды. 1958 жылы туған сол әпкем былтыр қайтыс болғаннан кейін мүлдем сынып қалды», - деді Сәкен Майғазиев журналист Ләйлә Сұлтанқызына берген сұхбатында.
Ол әпкесі тірі кезде анасын Алматыға жиі алып кетіп жүргенін, қазір «қызы қайтыс болғанда жүргені несі» деп айтады деген оймен бір орнында отырып қалғанын атап өтті.
«Ешқайда шықпай қойды. Үйде отыра бергесін жағдайы нашаралап барады», - дейді әртіс.
Ол ата-анасы тірі адамдарға оларды бір жерде отырғызбауға, әрі-бері жүргізуге кеңес берді.
«Қыдырту керек, тойға апару керек. Өткенде Айбекке, Ерке Есмаханға риза болдым. Қайбір жылы өзінің анасын Төрештің тойына алып келді. Осылай аналарымыз араласу керек. Өткенде Айбек (Бүркіт) «Сәкен, Айша босанып жатыр, тойыңа анамды алып барамын» деді. Шын қуандым. Бір жағы аналарымызды, әкелерімізді шақыру ойға келмегеніне қатты ыңғайсызданып қалдым. Айтайын дегенім, әпкеміз кеткеннен кейін анам өзін-өзі тастай салды. Атамдатсаң да, ботамдатпа деген осы екен», - деп түйіндеді Сәкен Майғазиев.