Қарағанды облысында су желілерін жаңартуға 5,1 млрд теңге бөлінді

Заңсыз шығарылған активтер есебінен қайтарылған қаражат ауыл тұрғындарын таза ауызсумен қамтуға бағытталады, деп хабарлайды Azattyq Rýhy. 

Су жүйесі жаңарып жатыр

Қарағанды облысындағы елді мекендерде су құбырларын салу және қайта жаңарту жұмыстарына 5,1 миллиард теңге бөлінді. Бұл қаржы Арнайы мемлекеттік қорға қайтарылған заңсыз активтер есебінен қаржыландырылады.

«Жобалар Қарағанды қаласында, сондай-ақ Тихоновка, Садовое, Колхозное, Актерек, Алихан ауылдары мен Көктенкөл станциясында жүзеге асырылады», – делінген ҚР Үкіметі таратқан ресми ақпаратта.

Ескі желілер тұрғындарды әбігерге салған

Қаражаттың бөлінуіне су құбырларының тозуы мен апаттық жағдайлардың жиілеуі себеп болды. Көптеген желі ондаған жыл бойы күрделі жөндеусіз пайдаланылып келген. Бұл:

• Ауызсудың жиі үзілуіне
• Апаттар санының артуына
• Тұрғындар тарапынан шағымдардың көбеюіне алып келді

Жаңарту жұмыстары 2025 жылдың соңына дейін толық аяқталады деп жоспарланған.

Қазақстанда ауызсуға кезең-кезеңімен қолжетімділік арттырылуда

ҚР Үкіметінің мәліметінше, қазіргі таңда ел бойынша ауызсуға қолжетімділікті арттыру бойынша ұлттық жоспар жүзеге асырылып жатыр. Бұл жоспар шеңберінде ауыл мен қала тұрғындарының тұрмыс сапасын жақсарту көзделген.

Индустрия және құрылыс министрлігінің мәліметі бойынша:

• Қарағанды қаласында сумен қамту деңгейі – 99,4%
• Облыстың ауылдық аймақтарында – 97,9%.