Президенттің сынынан кейін Бектенов туристік саланы дамыту бойынша кеңес өткізді

Қазақстан премьер-министрі Олжас Бектенов мемлекет басшысы Қасым-Жомарт Тоқаевтың туризм саласына қатысты тапсырмаларының орындалу барысы жөнінде кеңес өткізді. Бұл туралы Azattyq Rýhy ҚР Үкіметінің баспасөз қызметіне сілтеме жасап хабарлайды.

Алакөлдегі жағдай және жазғы демалысты ұйымдастыру мәселелері қаралды

Кеңес барысында премьер-министрдің орынбасары Ермек Көшербаев пен Туризм және спорт министрі Ербол Мырзабосыновтың Алакөл жағалауындағы жағдай, сондай-ақ еліміздегі туристік аймақтардағы жазғы демалысты ұйымдастыру, инфрақұрылым, сервис және қауіпсіздік мәселелері бойынша баяндамалары тыңдалды.

Президент ескертулерін дереу жою қажет – нақты тапсырмалар берілді

Үкіметтің мәліметінше, президенттің сын-ескертпелерін жедел жою үшін Ермек Көшербаев пен Ербол Мырзабосынов өңірлерге жұмыс сапарымен барады.

«Нәтижесінде кемшіліктерге жол берген жауапты тұлғаларды жауапкершілікке тарту туралы ұсыныс енгізіледі», – делінген ресми хабарламада.

Алматы тау кластері – халықаралық деңгейдегі курорт болмақ

Кеңесте Алматы тау кластерін дамыту жобасы да қаралды. Бұл жоба еліміздегі маңызды инвестициялық бастамалардың бірі ретінде атап өтілді.

Бастапқы кезеңде келесі инфрақұрылымдық жұмыстар жүргізіледі:

• Электр желілерін тарту;
• Канализация және газбен қамту жүйелерін жүргізу;
• Автомобиль жолдарын салу;
• Жанындағы аумақтарды абаттандыру.

«Жоба шеңберінде жазғы туризм инфрақұрылымын дамыту, тұрақты даму қағидаттарын енгізу, қоршаған ортаны цифрлық бақылау, сондай-ақ инклюзивті туризмді қамтамасыз ету көзделген», – делінген Үкімет хабарламасында.

Президент Алакөлдегі инфрақұрылым сапасын сынға алды

Еске салайық, бүгін мемлекет басшысы Қасым-Жомарт Тоқаев Алакөл көлі маңындағы туристік инфрақұрылымның сапасына көңілі толмайтынын айтып, Үкіметке еліміздегі туристік бағыттарды жедел түрде ретке келтіруді тапсырған болатын.