Қантты шамадан тыс пайдалану: дәрігерлер зардабын айтып, халыққа ескерту жасады

Қантты шамадан тыс тұтыну денсаулыққа елеулі қауіп төндіреді, оның ішінде семіздікке, екінші типті қант диабетіне және жүрек-қан тамырлары ауруларына алып келуі мүмкін. Бұл туралы Azattyq Rýhy агенттігі Pavlodarnews.kz-ке сілтеме жасап хабарлайды.

ДДСҰ: Қант мөлшері тәулігіне 25 грамнан аспауы керек

Дүниежүзілік денсаулық сақтау ұйымының (ДДСҰ) мәліметінше, қалыпты салмақтағы ересек адам үшін тәуліктік қантты тұтыну мөлшері 25 грамнан аспауы керек. Бұл шамамен 6 шай қасық.

Дәрігерлер қандай кеңес береді?

Сарапшылар тәуекелді азайту үшін келесі кеңестерді ұсынады:

• Өнімдердің құрамын мұқият оқып, қант аз немесе мүлдем жоқ тағамдарды таңдаңыз;
• Тәтті сусындардан бас тартып, оларды таза сумен немесе төмен калориялы баламалармен ауыстырыңыз;
• Кәмпиттің орнына – жеміс-жидек жеген дұрыс, бірақ жүзім мен банан сияқты өте тәтті жемістердің мөлшерін шектеу керек;
• Шөлді тек таза сумен басу қажет.

Жасырын қанттарға назар аударыңыз

Мамандар жасырын қанттар жиі кездесетін тағамдарға да көңіл бөлу керектігін айтады. Мысалы:

«Бір ғана ас қасық кетчупта 4 грамға дейін қант болуы мүмкін», – дейді облыстық санитарлық-эпидемиологиялық бақылау басқармасының мамандары.

Сондықтан зауыттық соустардан аулақ болып, үйде дайындалған тағамдарға табиғи қант алмастырғыштарын қолдану ұсынылады.