Сәуірде ҰБТ-ға қатыса алмаған талапкерлерге тағы бір мүмкіндік беріледі

Қосымша тестілеу 8-10 шілде аралығында өтеді

Фото: pixabay

Ұлттық тестілеу орталығы 4-6 шілде аралығында ҰБТ-ға қатысуға өтініш қабылданатынын мәлімдеді, деп хабарлайды Azattyq Rýhy.

Ұлттық тестілеу орталығының мәліметінше 10-25 сәуір аралығында дәлелді себептер бойынша өтініш бермеген талапкерлерден 4-6 шілде аралығында негізгі ҰБТ-ға қатысуға өтініш қабылданады:

денсаулық жағдайына байланысты емдеуде немесе карантинде болу (026/у медициналық анықтама болған жағдайда);
жақын туысының қайтыс болуы (растайтын құжаттар болған жағдайда);
республикалық және халықаралық олимпиадаларға, байқауларға және спорттық жарыстарға қатысу (№514 бұйрықтағы тізімге сәйкес);
төтенше жағдайлар туындаған кезде.

Өтініш пен растайтын құжаттарды (+ жеке куәлік) тестіленушілер uto@testcenter.kz электронды поштасына жолдау қажет. Тестілеу 8-10 шілдеде өтеді.

Еске сала кетейік, 2025 жылғы негізгі ҰБТ-ға өтініш қабылдау 28 сәуірде аяқталды. Тестілеу 16 мамырда басталып, 7 шілдеге дейін жалғасады. Талапкерлер негізгі ҰБТ-ны екі рет тапсырып, ең үздік нәтижесімен грант конкурсына қатыса алады.