Қырғызстанда «оқып жүрген» қазақстандық студенттер оқуынан шығарылды

Қырғызстанның Ұлттық қауіпсіздік мемлекеттік комитеті Ишеналы Арабаев атындағы Қырғыз мемлекеттік университетінде шетелдік студенттерге қатысты заңбұзушылықтарды анықтады, деп хабарлайды Azattyq Rýhy.

Сабаққа қатыспаса да, жүйеде «оқып жүр» деп көрсетілген

Комитет мәліметінше, ондаған шетелдік студент университетке ресми түрде қабылданғанымен, ел аумағында мүлде болмаған және сабақтарға қатыспаған. Соған қарамастан, олар оқу жүйесінде белсенді студенттер ретінде тіркелген.

Қызметтік жалған құжат жасау бабы бойынша іс қозғалды

Аталған факті бойынша Қырғыз Республикасының Қылмыстық кодексіне сәйкес «Қызметтік жалғандық» бабымен қылмыстық іс қозғалды. Арнайы құрылған комиссия бұл заңбұзушылықтарды растап отыр.

Оқудан шығарылғандардың арасында қазақстандықтар да бар

Комиссия шешімімен университеттен 59 шетелдік студент оқудан шығарылды. Олардың ішінде:

• 30-ы – Өзбекстан азаматы;
• 20-сы – Қазақстан азаматы;
• 9-ы – Ресей азаматы.

Тергеу жалғасуда – оқытушылар мен әкімшілік қызметкерлері тексерілуде

Қазіргі уақытта университет әкімшілігі мен оқытушыларының бұл іске қаншалықты қатысы бар екені анықталып жатыр. Қырғызстан ҰҚМК тексерісті жалғастыруда.