Ұйымдасқан қылмыстық топ 4,3 миллиард теңге жымқырған
Қазақстанда ұйымдасқан қылмыстық топтың мүшелері мемлекетке 4,3 миллиард теңге залал келтіріп, сотталды. Тергеу нәтижесінде «Таразэнергоцентр» акционерлік қоғамының барлық акциясы мемлекет меншігіне қайтарылды. Сегіз адам 3 жылдан 13 жылға дейінгі мерзімге бас бостандығынан айырылды, деп хабарлайды Azattyq Rýhy.
Тергеу нәтижесінде «Таразэнергоцентр» акционерлік қоғамының 100% акциясы мемлекет меншігіне қайтарылды. Тергеу материалдарына сәйкес, айыпталушылар ұйымдасқан қылмыстық топ құрамында әрекет етіп, заңсыз монополиялық табыс табу схемасын құрған. Олар бюджеттен 4,3 миллиард теңге ұрлаған.
Сот үкімі бойынша қылмыстық топтың барлық мүшесі кінәлі деп танылып, сегіз адам 3 жылдан 13 жылға дейінгі мерзімге бас бостандығынан айырылды.
2021 жылғы тамызда «Таразэнергоцентр» АҚ 2022-2026 жылдар аралығында жылу энергиясына арналған тарифті күрт көтеруге тырысты. Тарифті көтерудің себебі ретінде ЖЭО-4 жабдықтарын күрделі жөндеуден өткізуге кететін шығындардың артқаны көрсетілген. Алайда тексеру нәтижесінде бұл шығындардың көп бөлігі жалған екені анықталды.
«Таразэнергоцентр» акционерлік қоғамы – Тараз қаласын жылумен және ыстық сумен қамтамасыз ететін кәсіпорын. Компания 2004 жылғы 26 қарашада тіркелген.