Шерзат Полатты өлтірген қылмыскерлер сот үкіміне шағым түсірді

Марқұм Шерзат Полатты өлтірген қылмыскерлер сот үкіміне шағым түсірді, деп хабарлайды Azattyq Rýhy.

Олардың аппеляциялық шағымына қатысты мәліметті Шерзат Полаттың әкесі Қаржаубай Нұрымовтың заңгері Мейірман Шекеев мәлім етті.

«Апелляциялық шағымға қатысты, 21 маусым күні түсті. Сотталушылар өздерінің қолына үкімді алған күннен бастап 15 тәулік ішінде шағым түсіруге құқылы. Қазіргі уақытта сотталушылардың өздерінен және қорғаушыларынан, нақтырақ айтқанда Белғожаев пен Думан Ысқақтан басқасының бәрінен апелляциялық шағым түскен. Осыған байланысты болашақта соттың қаралу күні қай күнге қойылғаны жайлы хабардар етеміз.

Дәрігерге қатысты сот сараптамасы тағайындалды. Оған қатысты да қандай шешім шыққанын хабардар етемін», - деді Мейірман Шекеев.

Айта кетейік, Талғарда 4 қазанға қараған түні 16 жастағы Шерзат Полатты бір топ жігіт жабылып, ұрып, пышақтап, өлтіріп кеткен. Жуырда қылмыскерлерге қатысты сот үкімі жарияланды.

• Басты күдікті Абзал Шынасыл ҚР ҚК 99-бабы 2-бөлігі (адам өлтіру), 293-бабы 3-бөлігі (бұзақылық), 24-бабы 3-бөлігі (қылмысқа дайындалу және қылмысқа оқталу) бойынша 23 жылға сотталды.
• Равиль Сакиев – 293-бап 3-бөлігі (бұзақылық), 99-бап 2-бөлігі, 24-бап 3-бөлігі (адам өлтіруге оқталу) бойынша 20 жылға сотталды.
• Азамат Тоқтаубаев – 293-бап 3-бөлігі (бұзақылық), қосымша 188-бап (ұрлық) бойынша бұрынғы соттылықтарын ескере отырып, 15 жылға бас бостандығынан айырылды.
• Нұрқиас Ілиясов – 293-бап 3-бөлігі (бұзақылық), бұрынғы соттылығына байланысты 9 жылға сотталды.
• Шыңғыс Белғожаев – 293-бап 3-бөлігі (бұзақылық) бойынша 7 жылға сотталды.
• Дархан Әскентай – 293-бап 3-бөлігі (бұзақылық) бойынша 7 жылға бас бостандығынан айырылды.
• Нұрбол Тоқтаубаев – 293-бап 3-бөлігі (бұзақылық) бойынша 7 жылға сотталды.
• Дидар Қалиахмет – 293-бап 3-бөлігі (бұзақылық) бойынша 7 жылға бас бостандығынан айырылды.

Думан Ысқақ (кәмелетке толмаған) – 434-бап (ауыр қылмыс туралы хабарламау) бойынша 1 жыл 6 айға сотталды.