Жеке ұшақ апатына байланысты тергеу басталды
Астанада 22 маусым күні болған жеңіл моторлы TL-2000 ұшағының апатына қатысты қылмыстық іс қозғалды, деп хабарлайды Azattyq Rýhy ҚР Көлік полициясы департаментінің баспасөз қызметіне сілтеме жасап.
«TL-2000 маркалы жеке меншік жеңіл әуе көлігінің құлауына байланысты ҚР ҚК 344-бабы 3-бөлігі бойынша алдын ала тергеу амалдары басталды», – делінген ведомство таратқан мәлімдемеде.
Құлаған ұшақ жеке меншікке тиесілі болған. Алдын ала дерек бойынша, бортта болған екі адамның – пилот пен жолаушының қаза тапқаны расталды. Қазір апаттың нақты себептері анықталып жатыр.
Еске салайық, апат 2025 жылдың 22 маусымында, шамамен сағат 11:30-да Астана қаласына жақын Жоламан әуеайлағы маңында болды.
Қазір құзырлы органдар оқиға орнында тергеу амалдарын жүргізіп жатыр. Ұшақтың техникалық жағдайы мен ұшу қауіпсіздігіне қатысты талаптардың орындалу фактісі зерттелуде.
«Құлаған ұшақтың нақты қандай жағдайда пайдаланылғаны, техникалық бақылаудың жүргізілген-жүргізілмегені анықталады. Тергеу нәтижесі кейінірек жарияланады», – дейді Көлік полициясы өкілдері.