Жалпы ұзындығы 487 шақырымды құрайды
Атырау мен Орал арасын жалғап жатқан жүздеген шақырым жол орташа жөндеуден өтетін болды, деп хабарлайды Azattyq Rýhy.
«ҚазАвтоЖол» мәліметінше, алдағы уақытта республикалық маңызы бар KAZ12 «Атырау – Орал» автомобиль жолын орташа жөндеуден өткізу бойынша ауқымды жобаның жұмысы басталмақ. Бұл жол батыс өңірінің екі ірі қаласы – Орал мен Атырауды байланыстырады. Жалпы ұзындығы 487 шақырымды құрайды.
«Жоба 364 шақырым жол төсемін қамтымақ. Негізгі атқарылатын жұмыстар: иірімді учаскелерді жою, топырақ қайта өңдеу әдісімен топырақты қосу арқылы негізді күшейту, астыңғы және үстіңгі жабынды төсеу, жолжиекті күшейту, сондай-ақ жол белгілерін орнату және таңбаларды салу.
Қазіргі таңда қаржы көзі қарастырылып жатыр. Содан кейін жобалық-сметалық құжаттамасы әзірленіп, міндетті сараптамадан өтеді. Жоба кезең-кезеңмен жүзеге асырылатын болады.
Қосымша автожолда шұңқырларды жөндеу жұмысы жалғасып жатыр. Орташа жөндеу жұмысын 2025 жылдан 2027 жылға дейін өткізу жоспарланып отыр», - делінген «ҚазАвтоЖол» хабарламасында.