Оқиға барысы видеоға түсіп қалды
Павлодарда ер адамның полиция тарапынан ұсталуы әлеуметтік желілерде қызу талқыланып жатыр, деп хабарлайды Azattyq Rýhy.
Оқиға 6 маусым күні Павлодар қаласындағы Усольский шағынауданында тіркелді. Әлеуметтік желіде тараған видеодан ер адамның полицияға қарсылық көрсетіп, оны күшпен ұстап жатқан сәті байқалады.
Ұсталған адамның ағасының айтуынша, сол күні екі ағайынды және олардың екі досы көпірмен өтіп бара жатқан. Жанынан өткен адамдар тобына қатысты жаппай төбелес туралы хабар түскен соң, полиция оларды тоқтатқан. Полицейлердің бірі азаматтың неге аяқ киімсіз жүргенін сұрағанда, ол: «Маған солай ыңғайлы», – деп жауап берген. Артынша полиция бөлімшесіне барудан бас тартқан азаматты күшпен ұстаған. Ағасының айтуынша, оны мас адамдарды уақытша ұстау орнында соққыға жыққан және аяғы сынған.
Оқиғадан кейін зардап шеккен азаматтар прокуратураға ресми шағым түсірген.
Павлодар облыстық полиция департаменті бұл жайтқа қатысты түсініктеме берді. Ресми мәліметке сәйкес, көпір маңында бірнеше адам жасаған бұзақылық дерегі бойынша қатысушылар ұсталып, полиция бөліміне жеткізілген.
«Одан бөлек, бір азаматқа билік өкілін қорлау фактісі бойынша қылмыстық іс қозғалды. Қазіргі уақытта сот бұл азаматқа қатысты бұлтартпау шарасын қарастырып жатыр», – делінген полиция таратқан ақпаратта.
Зардап шеккен азаматтың полиция тарапынан соққыға жығылғаны туралы шағымына қатысты бейнежазбалар тексерілгенімен, полиция қызметкерлері тарапынан дене жарақатын келтіру расталмаған. Соған қарамастан, бұл мәліметтер бойынша жан-жақты тексеру жүргізіліп жатқаны айтылды.
Қазіргі уақытта оқиғаға қатысы бар барлық жайт зерттеліп, оқиғаның толық мән-жайын анықтауға бағытталған тергеу амалдары жүргізіліп жатыр.