Онда жөндеу жұмыстары басталады
Астанада жол қозғалысына қатысты уақытша өзгерістер енгізіледі. Қала билігі 7 маусымнан бастап бірнеше көше учаскелерінде орташа жөндеу жұмыстарын бастайтынын хабарлады, деп хабарлайды Azattyq Rýhy Астана қаласы әкімдігінің баспасөз қызметіне сілтеме жасап.
7–10 маусым аралығында Алматы көшесінің Сауран көшесінен Қабанбай батыр даңғылына дейінгі бөлігінде жол қозғалысы жартылай шектеледі. Көлік қозғалысы екі бағытта да бір жақ жолағы арқылы ұйымдастырылады.
7–13 маусым аралығында Ш. Қалдаяқов көшесінің Тәуелсіздік даңғылынан Ж.Нәжімеденов көшесіне дейінгі бөлігінде жол қозғалысы кезең-кезеңмен шектеледі. Автокөліктерге екі бағытта бір жақ жолағы арқылы қозғалыс қамтамасыз етіледі.
7–8 маусым аралығында Домалақ ана көшесінде, Қорғалжын тас жолынан Қ.Мұхамедханов көшесіне дейінгі учаскеде, жолдың үстіңгі қабаты төселеді. Осыған байланысты көше толықтай жабылады.
Астана қаласының әкімдігі жүргізушілер мен жаяу жүргіншілерден алдын ала маршруттарын жоспарлауды сұрайды.
«Қозғалыс қауіпсіздігін қамтамасыз ету үшін уақытша жол белгілері мен бағыттаушы көрсеткіштер орнатылады. Уақытша қолайсыздықтарға түсіністікпен қарап, қозғалысты алдын ала жоспарлауыңызды сұраймыз»,– делінген хабарламада.