Cardiff University Қазақстандағы алғашқы кампусын Астанада ашты

Бүгін Астанада Ұлыбританияның жетекші жоғары оқу орындарының бірі — Cardiff University-дің Қазақстандағы алғашқы кампусының ресми ашылуына арналған Ашық есік күні өтті. Іс-шараға 400-ден астам адам қатысты, деп хабарлайды Azattyq Rýhy.

Жаңа кампус Сығанақ көшесі, 38/1 мекенжайында орналасқан. Іс-шараны ұйымдастырған — «Qualified Centre of Education» қоғамдық қоры.

Ашылу салтанатына Қазақстанның мемлекеттік органдарының өкілдері, Ұлыбритания елшілігінің қызметкерлері, бизнес және білім саласының сарапшылары қатысты. Олар студенттерге құттықтау сөздерін арнап, халықаралық деңгейдегі сапалы білімнің маңыздылығын атап өтті.

Құрметті қонақтар қатарында ҚР Ғылым және жоғары білім министрі Саясат Нурбек, Ұлыбританияның Қазақстандағы елшісі Кэти Лич, сондай-ақ Cardiff University басшылығы мен академиялық өкілдері болды.

Cardiff University — халықаралық деңгейде мойындалған оқу орны. QS World University Rankings 2025 тізімінде 186-орында, ал Times Higher Education 2024 рейтингінде 190-орында тұр. Университет әсіресе бизнес-әкімшілік, инженерия, геология және білім беру салаларында жоғары көрсеткіштерге ие.

Ашық есік күні аясында қонақтар:

• университеттің оқу бағдарламаларымен танысты,
• оқытушылармен және әкімшілік өкілдермен кездесті,
• жаңа кампустың жатақханаларына экскурсия жасады,
• түрлі сала мамандарымен бейресми пікір алмасты.

Cardiff University кампусының ашылуы — қазақстандық студенттерге елден шықпай-ақ әлемдік деңгейдегі білім алуға жол ашатын маңызды оқиға. Бұл Қазақстанның жоғары білім беру саласында жаңа кезеңнің басталғанын білдіреді.