Құрылыс нысандарындағы рейд нәтижелері
Алматыда көші-қон қызметі заңсыз көші-қонмен күресу мақсатында бірқатар рейдтік іс-шаралар өткізуде. Түрксіб ауданындағы құрылыс алаңдарының бірінде көші-қон заңнамасын бұзып, заңсыз жұмыс істеп жүрген 22 шетелдік азамат анықталды, деп хабарлайды Azattyq Rýhy.
9 адамға рұқсат құжаттары болмай жұмыс істегені үшін әкімшілік хаттама толтырылды.
Қалған 13 шетелдікке алдын алу шаралары қолданылып, Алматы қалалық ПД қабылдау-тарату орнына орналастырылды.
Қазіргі таңда заң бұзған жұмыс берушілерді жауапкершілікке тарту жұмыстары жүргізілуде. Бұл – көші-қон талаптарын сақтамаған құрылыс мекемелеріне қатысты заң аясында қатаң шаралар қабылданатынын көрсетеді.
Осыған ұқсас рейд Алатау ауданында да өтті. Нәтижесінде жөндеу жұмыстарына тартылған 9 шетелдік анықталып, олар да қабылдау-тарату орнына жеткізілді.
Наурызбай ауданында шетелдіктердің тұратын жерлері мен құрылыс нысандары тексерілді. Тексеру барысында жеке куәлігі жоқ 10 адам анықталды.
Алматы қалалық ПД Көші-қон қызметі басқармасының бастығы Еркін Амантаев:
«Біз көші-қон заңнамасын бұзу деректерін анықтау және алдын алу бойынша жүйелі жұмысымызды жалғастырып жатырмыз. Құрылыс алаңдарында тіркеусіз және заңсыз жұмыс істеп жүргендерге ерекше назар аударылады. Біздің міндетіміз — қаладағы тәртіп пен қауіпсіздікті қамтамасыз ету».