Мобильді қосымша арқылы зейнетақы мен жәрдемақыны есептеуге болады

«Азаматтарға арналған үкімет» мемлекеттік корпорациясы» АҚ «ЦОН» мобильді қосымшасында зейнетақы мен жәрдемақы түрлерін есептейтін пайдалы сервисті іске қосты, деп хабарлайды Azattyq Rýhy.

Үйде отырып есептеуге болады

Енді үйден шықпай-ақ алдын ала әлеуметтік төлемдердің мөлшерін шамалауға болады.

«Сервис 2025 жылдың 28 сәуірінен бастап жұмыс істеп тұр. Содан бері 4 470 адам есептеулер жүргізіп үлгеріпті», - деп жазылған компанияның хабарламасында.

Бүгінгі таңда калькулятор арқылы 8 әлеуметтік төлем/жәрдемақы мен зейнетақы түрі бойынша 5 негізгі санатты есептеуге мүмкіндік бар:

• зейнетке шығу: базалық, ынтымақты және жинақтаушы зейнетақы;
• бала туу: жүктілікке, босануға немесе бала асырап алуға байланысты табыстан айырылу кезіндегі төлем, сондай-ақ 1,5 жасқа дейінгі бала күтімі бойынша жәрдемақы;
• мүгедектік: еңбекке қабілеттілігінен айырылу жағдайындағы әлеуметтік төлем;
• жұмыссыз қалу: жұмысынан айырылу жағдайы бойынша әлеуметтік төлем;
• жақын адамынан айырылу: асыраушысынан айырылу жағдайы бойынша төлем.

Төлем нәтижесі шамамен көрсетіледі

Айта кетері, есептеу пайдаланушы енгізген деректер негізінде жүргізілетіндіктен, төлем нәтижесі шамамен көрсетіледі және ақпараттық сипатта беріледі.

Әлеуметтік төлемдердің нақты мөлшері уәкілетті мемлекеттік органға өтініш беруші ұсынған мәліметтер негізінде есептеліп, ресми түрде тағайындалады.

Қызметті пайдалану үшін «ЦОН» мобильді қосымшасын (Google Play және App Store-да қолжетімді) жүктегеннен кейін мемлекеттік биометриялық сәйкестендіру сервисі арқылы авторизациядан өту қажет. Одан кейін тиісті бөлімді таңдап, қажетті деректерді енгізу керек.