Алаяқтар қазақша «сөйлей» бастады: жаңа айла-шарғылар белгілі болды

Цифрлық заманда алаяқтықтың түрі де өзгеріп жатыр. Соңғы уақытта қылмыскерлер жасанды интеллект пен deepfake технологияларын шебер пайдаланып, адамдардың сеніміне кірудің жаңа жолдарын меңгеріп алды, деп хабарлайды Azattyq Rýhy.

ЖАСАНДЫ ИНТЕЛЛЕКТ – ЖАҢА АЛАЯҚТЫҚ ҚҰРАЛЫ

ҚР ІІМ мәліметінше, алаяқтар енді банк қызметкері, полиция немесе тіпті жақын туысыңыздың дауысын дәл салып, хабарласа алады. Олар генеративті жасанды интеллектіні пайдалана отырып, нақты адамның дауысын көшіріп, сенімді хабарламалар мен қоңыраулар арқылы өз мақсатына жетуге тырысады.

DEEPFAKE – КӨЗІҢІЗДІ АЛДАЙТЫН ВИДЕО

Тағы бір қауіп – deepfake технологиясы. Алаяқтар танымал тұлғалар мен жақындарыңыздың түр-әлпетін шынайы етіп жасап, видеоқоңырау шалып алдауы мүмкін. Бұл – психологиялық қысым жасау арқылы адамның жылдам шешім қабылдауына итермелейтін тәсіл.

САҚ БОЛЫҢЫЗ: МЫНА БЕЛГІЛЕРГЕ НАЗАР АУДАРЫҢЫЗ

Полиция алаяқтардан қорғану үшін төмендегідей белгілерге назар аударуды кеңес етеді:

• Эмоциясыз немесе робот тәрізді дауыс;
• Қисынсыз сөйлемдер мен байланыс;
• «Тез шешім қабылдаңыз» деген қысым;
• Бейтаныс нөмірлерден келген бейнеқоңыраулар.

ЖЕКЕ ДЕРЕКТЕР – ТЕК ӨЗ ҚОЛЫҢЫЗДА

• ЖСН, банк картасының нөмірі, SMS арқылы келген кодтар, құпиясөздер – ешкімге берілмесін.
• Ақпаратты тек ресми дереккөздерден алыңыз (банк қосымшасы, полиция сайты, eGov порталы).

«Күмән тудыратын хабарламалар мен қоңыраулар туралы дереу жақындарыңызға хабарлаңыз немесе 102 нөміріне қоңырау шалыңыз», - делінген хабарламада.