«Елге көмек» қоры басшыларының тағы бір былығы әшкереленді

Журналист Руслан Өтепбай «Елге көмек» қайырымдылық қоры басшыларының тағы бір былығын әшкереледі, деп хабарлайды Azattyq Rýhy.

«Видеодағы аудионы Ілияс Сариев Жансұлу есімді келіншекке жіберген. Мақсаты – жалғызбасты анаға несие алдыру. Алайда Жансұлу несие алып бере алмаймын дейді. Бірақ Ілияс анасының ауырып жатқанын алға тартып, өтініш емес, келіншекке талап қояды. Жансұлу Ілиясқа Құдайдай сеніп, оның туған қарындасына 2 миллион теңге несие алып береді. Алайда ол қыз Ілиястың қарындасы емес, сіз бен бізге таныс Ақтоты болып шығады», - деп жазды Руслан Өтепбай желідегі парақшасында.

Ең сорақасы Ақтоты келіншектің телефонын алып, басқа банктен тағы да 1 миллион теңге несие шығарып, дереу өзінің шотына аударып алады.

«Мұны Жансұлу тек келесі күні байқайды. Бұл дерек бойынша да Ақтоты мен Ілиястың үстінен қылмыстық іс қозғалды», - деп түйіндеді журналист.

Еске сала кетейік, Ілияс Сариев өткен айда алаяқтық жасады деген күдікпен ұсталды. Ол мұқтаж отбасыларға қордың есебінен үй әперемін деп халықтан қаржы жинап, өзінің жеке басына жұмсаған.