Қазақстанда балаларға арналған SIM-карталар іске қосылды

Қазақстанда кәмелетке толмағандарды интернеттегі зиянды контенттен қорғауға арналған арнайы балаларға арналған SIM-карталар – SIM KIDS пилоттық режимде іске қосылды. Бұл туралы Бас прокурор Берік Асылов өзінің X парақшасында жазды, деп хабарлайды Azattyq Rýhy. 

Асыловтың айтуынша, жоба 2023–2025 жылдарға арналған балаларды зорлық-зомбылықтан қорғау, суицидтің алдын алу және олардың әл-ауқатын қамтамасыз ету бойынша кешенді жоспар аясында жүзеге асырылып жатыр. Алматы қаласы – SIM KIDS карталары алғаш енгізілген өңір.

«Бұл – суицидті, порнографияны, есірткі құралдарын, онлайн-казиноны және өзге де интернет-қауіптерді насихаттайтын мазмұндардан қорғайтын арнайы SIM-карта», – деп жазды Асылов.

Аталған SIM-карта ата-аналарға баласының смартфонын бақылауға мүмкіндік береді: орнатылған қосымшаларды қадағалау, қауіпті сайттарға кіруді шектеу және тіпті телефон үнсіз режимде болса да, қоңырау шалу мүмкіндігін береді.

Бас прокурордың мәліметінше, бұл бастама ата-аналар тарапынан үлкен қызығушылық туғызған, ал пилоттық кезең аяқталған соң SIM KIDS карталарын ел бойынша кеңінен қолжетімді ету жоспарланып отыр.

«Бала цифрлық кеңістікте суицидтік сипаттағы қауіпті ойындарға, құмар ойындарға тартылудан және психикасына зиян келтіретін кез келген контенттен қорғалуы тиіс», – деп атап өтті Асылов.

Сондай-ақ, ол балалардың қауіпсіздігін қамтамасыз етудегі басты рөл – отбасыға тиесілі екенін айтып, ата-аналарды балалардың көңіл күйі мен қызығушылықтарындағы өзгерістерге бейжай қарамауға шақырды.