Астанада LRT құрылысына байланысты көлік қозғалысы шектеледі

Астанада LRT құрылыс жұмыстарына байланысты қаланың оңтүстік-батыс айналма жолындағы көлік қозғалысы уақытша шектеледі, деп хабарлайды Azattyq Rýhy City Transportation Systems баспасөз қызметіне сілтеме жасап.

«LRT құрылыс жоспарына сәйкес, 101-102 учаскесінде болат қорапты арқалық орнатуға байланысты 14 сәуір күні сағат 08:00-ден 20:00-ге дейін Астананың оңтүстік-батыс айналма жолы мен Қабанбай батыр даңғылы қиылысындағы толық жоңышқа жапырағы типтес жолайрықта, Қарағанды тасжолынан Қосшы қаласы бағытындағы қозғалыс уақытша шектеледі», – делінген хабарламада.

Сондай-ақ, 15 сәуір күні дәл осы жолайрықта, бірақ Қосшы қаласы бағытынан Қарағанды тасжолына қарай жүретін көлік қозғалысы сағат 08:00-ден 20:00-ге дейін уақытша тоқтатылады.

Жол қозғалысына қатысушылардан уақытша қолайсыздықтарға түсіністікпен қарап, балама жолдарды алдын ала таңдауға кеңес беріледі.