Қожа Ахмет Ясауи кесенесінің айналасы абаттандырылады
Түркістан төріндегі теңдесіз Қожа Ахмет Ясауи кесенесінің айналасы абаттандырылады. Облыс басшысы Өмірзақ Шөкеев кесене аумағына ең құнды ағаш түрлерін отырғызуды тапсырды. Бұл туралы Түркістан облысы әкімінің баспасөз қызметі хабарлады.
Осыдан тура бір жыл бұрын Баку қаласында Түркістан облысының делегациясы ЮНЕСКО-ның дүниежүзілік мұра комитетінің 43-сессиясында маңызды келісімдерге қол жеткізді. Онда Ясауи кесенесі аумағындағы құрылыс объектілерінің дүниежүзілік мұраға әсерін бағалау мәселелері де қаралған болатын. Дәл осы жиында кесененің айналасындағы аумақты абаттандыру бойынша шешім қабылданды.
Еске сала кетейік, осыдан екі жыл бұрын, 19 маусымда президенттің жарлығымен Оңтүстік Қазақстан облысының орталығы Шымкенттен Түркістан қаласына көшті. Бүгінде Түркістан қаласында басқа облыстардың «асарлатуымен» бірқатар нысандар салынды. 2019 жылы 12 нысанның құрылысы аяқталды. Биыл 21 нысанды пайдалануға беру жоспарланып отыр.