Арқалықта өрт шыққан үйден 14 адам эвакуацияланды

Арқалық қаласындағы көпқабатты тұрғын үйлердің бірінде өрт шығып, құтқарушылар 14 адамды қауіпсіз жерге эвакуациялады. Бұл туралы ҚР Төтенше жағдайлар министрлігінің баспасөз қызметі жазды,  деп хабарлайды Azattyq Rýhy. 

«Өрт төртінші қабаттағы пәтерде тұтанған. Қалың түтін тез арада бүкіл подъезді шарпыған. Оқиға орнына шұғыл жеткен өрт сөндірушілер жоғарғы қабаттардан 14 адамды, оның ішінде 6 баланы эвакуациялады. Жедел әрекеттің арқасында құтқарушылар қайғылы жағдайдың алдын алды», — делінген хабарламада. 

Құтқарушылар үшін ерекше қауіп түтін басқан пәтерде болған екі газ баллоны болған. Өрт сөндірушілер оларды сыртқа шығарып, жарылыс қаупін болдырмады. Қазір өрт толығымен сөндірілді, ал оның шығу себептері анықталып жатыр.

Оқиға салдарынан алты адам, оның ішінде бесеуі бала, медициналық тексеруден өту үшін қалалық ауруханаға жеткізілді. Дәрігерлердің мәліметінше, олардың өміріне қауіп жоқ, жағдайлары тұрақты.