Астана тұрғыны TikTok-тағы эфирі үшін қылмыстық жауапқа тартылды

Астаналық ер адам TikTok әлеуметтік желісінде тікелей эфир өткізіп, сол арқылы қылмыстық іс фигурантына айналды, деп хабарлайды Azattyq Rýhy

Қалалық полиция департаментінің баспасөз қызметінің мәліметінше, видеоны интернет кеңістігін бақылау барысында Экстремизмге қарсы іс-қимыл басқармасының қызметкерлері анықтаған.

«Сараптама қорытындысына сәйкес, жарияланған видеода ұлтаралық араздықты қоздыру, қазақ ұлты өкілдерінің ұлттық ар-намысы мен қадір-қасиетін қорлау, сондай-ақ қоғам мен мемлекетті тұрақсыздандыруға бағытталған белгілер бар», – делінген полиция таратқан хабарламада.

Күдікті ұсталып, уақытша ұстау изоляторына қамалды. Қазіргі таңда тергеу амалдары жүргізілуде.

Полиция өкілдері Қазақстан заңнамасына сәйкес, ұлтаралық, этникалық және діни араздықты қоздырғаны үшін 2 жылдан 7 жылға дейін бас бостандығынан айыру жазасы қарастырылғанын ескертті.