Бас прокуратура азаматтардың қандай мәселелерге жиі шағымданатынын айтты

Бас прокуратура қазақстандықтардың ең жиі қандай мәселелер бойынша шағымданатынын жариялады, деп хабарлайды Azattyq Rýhy. 

Ведомствоның мәліметінше, 2025 жылдың алғашқы екі айында прокуратура органдарына 70 мыңнан астам өтініш түскен. Бұл өткен жылдың сәйкес кезеңімен салыстырғанда 14%-ға көп.

Қазақстандықтардың ең көп шағымданатын мәселелері:

• Тергеу және анықтау органдары қызметкерлерінің заңсыз әрекеттері;
• Олардың шығарған процестік шешімдері;
• Қылмыстық және азаматтық істер бойынша сот актілеріне келіспеушілік;
• Тексеру жүргізу кезінде құқықтардың бұзылуы;
• Сот орындаушыларының әрекеті немесе әрекетсіздігі;
• Тұрғын үй қатынастары, жер заңнамасы саласындағы заң бұзушылықтар және жасалған қылмыстар туралы арыздар.

Бас прокуратура азаматтардың сот актілеріне қатысты шағымдарына да тоқталды. Егер азаматтық істер прокурордың қатысуынсыз қаралған болса (мемлекет, қоғам немесе өзін қорғай алмайтын азаматтардың мүдделеріне қатысты емес санаттар), прокуратура бұл мәселелер бойынша арыздарды қарамайтынын ескертті.

«Іс жүзінде азаматтар прокуратураға осы мәселелер бойынша жиі жүгініп, жеке қабылдауға сұраныс білдіреді. Алайда, прокуратураның құзыретіне жатпайтындықтан, мұндай өтініштер қанағаттандырылмайды», – деп түсіндірді ведомство өкілдері.