«420 мың еуро Ресей азаматына аударылған»: атыраулық футболистердің үш ай бойы жалақы алмау себебі түсіндірілді

Әлеуметтік желілер мен мессенджерлерде «Атырау» футбол клубының ойыншылары мен қызметкерлерінің Атырау облысы басшылығынан көмек сұраған үндеуі тарады, деп хабарлайды Azattyq Rýhy.

Үндеудің басты себебі – клуб қызметкерлері мен ойыншылары үш айдан бері жалақыларын ала алмай отыр. Олар бұл жағдайға жергілікті дене шынықтыру және спорт бөлімін кінәлайды. 

Футболшылардың айтуынша, облыстық бюджеттен басқа спорттық клубтарға (волейбол, хоккей) қаржы бөлінгенімен, «Атырау» ФК қаражатсыз қалған.
Спорт журналисі Владимир Жарков (ZharkOFF Telegram арнасының авторы) бұл мәселеге қатысты Атырау облысының дене шынықтыру және спорт басқармасынан ресми жауап алды.

Атырау облысының дене шынықтыру және спорт басқармасы «Атырау» футбол клубының 2022-2024 жылдар аралығындағы қызметіне жүргізілген тексеру барысында анықталған заң бұзушылықтар туралы хабарлады.

Негізгі заң бұзушылықтар

1. Бюджет қаражатын тиімсіз пайдалану


• 2023 жылдың ақпанында футболшы 500 мың еуроға шетелдік клубқа ауыстырылды, алайда оның 420 мың еуросы Ресей азаматына негізсіз аударылған. Делдалмен келісім трансферден екі апта бұрын жасалған, бұл оның заңдылығына күмән тудырады.

• 2024 жылдың желтоқсанында Қазақстан футбол федерациясынан бөлінген 65 миллион теңгенің 20,4 миллионы негізсіз есептен шығарылып, жеткізілмеген тауар үшін 30 миллион теңге аударылған.

2. Сенім шартын бұзу


• 662,7 миллион теңге пайда алынғанымен, оның 132,5 миллионы бюджетке түспеген.

• Құрылтайшыға қаржылық есептіліктің жүйелі түрде ұсынылмауы.

• Футболшылардың жалақысы бекітілген 2 миллион теңге лимиттен 3 миллионға, ал жаттықтырушының жалақысы 4 миллион теңгеге дейін асып кеткен.

• «Судоремонтник» стадионы мен командалық автобус жалға беру келісімінсіз заңсыз пайдаланылған.


3. Жабдықтарды қымбат бағамен сатып алу:

• Нарықтағы құны 200-300 мың теңге тұратын кір жуғыш машина 1,8 миллион теңгеге алынған.

• 2024 жылдың қаңтарында 233 миллион теңгеге шығыстарды алдын ала мақұлдамай шот-фактуралар ұсынылған.

4. Төмен спорттық көрсеткіштер


• Клуб Қазақстан кубогының финалдық кезеңіне (2018, 2019, 2024) шыққанымен, ел чемпионатында 7-орыннан жоғары көтерілмеген.

• Қазақстан құрамасына және Еуропаның жоғарғы лигаларына ойыншыларды дайындау көрсеткіші төмен.

5. Жергілікті ойыншылардың қысқаруы


2021 жылы клуб құрамында 16 жергілікті ойыншы болса, 2024 жылы олардың саны 5-ке дейін азайған, ал шетелдік ойыншылардың саны 12-ге жеткен. Бұл жергілікті спортшылардың дамуына кері әсерін тигізіп жатыр.

Қабылданған шаралар

Прокуратура заң бұзушылықтарды жою және кінәлі тұлғаларды тәртіптік жауапкершілікке тарту туралы ұйғарым шығарды.

Осыған байланысты:


• Клубты мемлекет меншігіне қайтару,

• Заңсыз пайдаланылған қаражатты қайтару,

• Жергілікті спортшыларды дамытуға басымдық беру,

• Шетелдік ойыншылардың санын қысқарту,

• Бюджет шығыстарын қайта қарау мүмкіндігі қарастырылады.

Қазір «Атырау» ФК-ны мемлекет меншігіне қайтару және ойыншылар мен қызметкерлердің жалақысын уақытылы төлеу мәселесін шешу бойынша жұмыстар жүргізіліп жатыр.