Бердібек Сапарбаев жексенбі күні базар аралады

Жексенбі күні Жамбыл облысының әкімі Бердібек Сапарбаев Тараздағы бірқатар сауда орындарының жұмысымен танысты, деп хабарлайды Azattyq Rýhy  әкімнің баспасөз қызметіне сілтеме жасай отырып. Бердібек Сапарбаев алдымен қаланың шығыс шетінде орналасқан «Ауыл Береке» базарына барған.

«Онда облыс әкімі азық-түлік тауарларының ассортиментімен, сапасымен және азық-түліктің бағасымен танысты. Сондай-ақ, сатушылар мен тұтынушыларды әңгімеге тартты. Қазір базарда жеміс-жидек, құрылыс материалдары мен ауыл шаруашылық өнімдерінің көтерме сауда секторы жұмыс істеп тұр. Карантинге байланысты азық-түлік емес тауарлар сататын орындар жабылған», - деп хабарлайды баспасөз

Базарды әбден аралап көрген аймақ басшысы  бірқатар маңызды мәселелерге тоқталды.

«Бұған дейін мен базар аумағын ретке келтіруді, сауда орындарын жақсартуды, ыңғайлы жағдай жасау мәселелеріне назар аударуды тапсырған болатынмын. Алайда, бұл нұсқаулар толығымен орындалмаған. Жайлы сауда павильондары жоқ. Кейбір сатушылар жерде сауда жасап отыр. Көлік құралдарының базардағы ретсіз қозғалысы өрт қаупін тудырады»,  - деді Сапарбаев.

Санитарлық-эпидемиологиялық талаптар да толығымен сақталмаған. Сатушылар да, сатып алушылар да бетперде кимейді, адамдар арасындағы әлеуметтік арақашықтық сақталмайтыны байқалған.

«Нарық қызметкерлері азық-түлік емес сектордағы жұмысты қайта бастауды сұрап жатыр. Алайда, базар әкімшілігі қажетті санитарлық талаптардың сақталуын қамтамасыз ете алмай отыр. Тиісті шаралар қабылдаңыздар, содан кейін ғана базарды толық ашу туралы айтуға болады. Пандемия кезінде біздің азаматтарымыздың денсаулығына қатысты қауіпсіздік шараларын елемеуге жол жоқ»,  - деді Бердібек Сапарбаев базар басшылығына.

Сондай-ақ, аймақ басшысы «Орталық» және «Атакент» базарларын ат басын бұрып, облыс орталығындағы демалыс саябақтарының аумағын аралап көрді.

Сонымен қатар, Бердібек Сапарбаев Жамбыл облысы бойынша Шекара қызметі департаментінің жұмысымен, әкімшілік ғимаратының жай-күйімен танысты.